KALIBO, Aklan — Aminado ro Malinao Municipal Police Station nga maskin sanda hay nakibot sa sunud-sunod nga insidente it pagpamaril sa nasambit nga banwa.
Nakalista it daywang shooting incidents maghalin ko buean it Enero 2024 hasta makaron nga buean it Hulyo.
Suno kay P/Capt. Christian John Nalangan, Chief of Police it Malinao Police Station, ginaekspektar nanda nga ko mga buean it Mayo ro may maabo nga insidente bangud maabu sa raya nga tiempo it mga kapyestahan.
Dugang pa it opisyal nga kon maabo nga kapyestahan hay maabo man ro mga binayle, apang ko buean it Mayo hay uwa sanda it nailistang mga kaparehong kaso.
Nakibot eamang sigon sanda kat sa buean eot-a it Hunyo nag sunod-sunod ro mga insidinte it pagpamaril kon sa siin naka record it daywang insidente.
Natabo ro sambilog sa Barangay Kinalangay, Nuevo ag ro ulihi hay sa Barangay Rosario sa nasambit nga banwa.
Sa pag usisa, narekover ro armas nga gingamit sa Brgy. Kinalangay, Nuevo ag nakapasaka eon it kaso pinaagi sa regular filling kontra sa suspek sa Aklan Prosecutors Office.
Samtang, ro ulihing insidente sa Brgy. Rosario kon siin may nakita nga basiwo ag sangka slug apang uwa pa natumod ro suspek ag owa narekover ro ginamit nga armas.
Sa pihak nga parte, mas pa sigon nanda nga ginpabaskog ro andang kampanya kontra sa loose firearms pinaagi sa TKAL ukon “TOKHANG KUNTRA ARMAS LUTHANG” kon sa siin ro tuyo kara hay pabaskugon ro programa it PNP.
Umpisa Enero hasta makaron nga Hulyo hay naka pa surrender eon sanda it 6 nga loose firearms ag tatlo nga ka explosives.
