KALIBO, Aklan—Gin-imbitahan sa estasyon it pulisya ro ap-at nga menor de edad matapos maaktuhan nga ginatakaw ro gasolina it sangka naka parking nga motorsiklo bandang alas 2:30 it aga-aga sa Brgy. Daguitan, Banga.
Ro mga pamatan-on hay naga-edad it 15 hasta 17 anyos.
Base sa imbestigasyon it banga police station, pilang adlaw eon nga nataeupangdan it tag-ana it tricycle nga si Ryan Rusgal nga pirmeng nagakina-ubos ro gasolina it anang saeakyan rason nga ginbantayan nana raya.
Dikara hay natiempuhan nana ro mga menor de edad nga ginasaylo ro gasolina halin sa anang tricycle paagto sa sangka bote it aeak.
Bangud kara, insigidang nagtawag it pulis si rusgal ag ginbitbit ro ap-at nga mga binatilyo kaibahan ro bote nga may sueod nga gasolina bilang ebidensiya.
Ginapatihan nga posibleng pagagamiton man it mga menor de edad ro gasolina sa andang motorsiklo para sa pagwinarang.
