KALIBO, Aklan- Nagbilog ro barangay council it Pagsanghan, Banga it sangka team it auxiliary police agud nga magbantay ag maghimo it random inspection agud nga malikawan ro paeanakawan ag iba pang krimen sa andang lugar.
Suno kay Kagawad Cris Retiso, Chairman it Peace and Order nga naisipan nanda ro nasambit nga plano kasunod it mga natabu nga panakawan sa andang lugar ag hugut nga mapatuman ro curfew hour sa mga pamatan-on.
Ginpahayag nga ro team hay ginaeakipan it 20 tanan nga mga barangay tanod. Gintunga sigon nanda raya sa limang grupo agud nga bueos-bueos nga magpatigayon it pagpatrolya kada gabi-i sa sueod it ap-at nga oras.
Handum man it opisyal nga mabutangan it close circuit television ukon CCTVs ro pila sa mga importanteng lugar sa andang barangay. Nag apela man imaw it kooperasyon sa mga residente agud nga indi mabiktima it mga manakaw.
Sa pihak nga parte, sambilog pa sa gusto nanda nga ipatuman sa andang lugar hay ro pagbawae sa mga motorsiklo nga may open muffler ukon masangag nga tambutso.
Samtang, ginkumpirma ni kagawad Retiso nga patay nga baboy nga dumaeaga nga una eon sa state of decomposition ro sueod it daywang ka sako nga ginpilak sa suba sa may parte it tulay sa boundary nanda it Brgy. Venturanza.
Ginkabuligan sigon nanda raya nga haw-ason sa tubi ag gin-eubong. Nasayuran nga bangud sa grabeng mabaho nga hugum , pilang mga residente maeapit sa lugar ro nagreklamo.
Bangud sa natabu, plano nanda nga butangan it iwag sa lugar ag tarpaulin agud nga matahap eon ro mga tawo nga magpilak it basura nga nagatuga it pag-stagnant it tubi sa suba.
