Ginpahayag ni Noraldin Macaponggis, tagapaghambae it Aklan Islamic Jama’a Incorporated , sangka muslim community sa probinsiya nga kahapon nga adlaw it Domingo nag-umpisa ro andang mga aktibidad para sa tatlong adlaw nga selebrasyon it Eid al-Adha ukon Feast of Sacrifice.
Kahapon suno kana hay nagtililipon sanda sa andang mga mosque para sa unang adlaw it selebrasyon nga magatapos hin-aga nga adlaw it Martes.
Gindugang pa ni Macaponggis nga kahapon, June 16 ro Eid al-Adha 2024 matapos gin-anunsiyo it Bangsamoro Darul Ifta ag National Commission on Muslim Filipinos.
Bangud nga holiday makaron nga adlaw it Lunes sandig sa Executive Order nga ginpaguwa it Malacañang, kaabuan sa andang mga igmanghud nga Muslim hay nag-agto sa mga beaches ag mga resorts agud nga magselebrar.
Ro Eid’l Adha suno kana hay tiempo it paghaead, pagkaeasugot, ag pagmaeahaean.
Raya sigon hay pagdumdum nanda sa naging kahauman ni Ibrahim nga isakripisyo ro anang unga nga si Ismael bilang pagsunod sa sugo ni Allah.
Ro selebrasyon hay senyales man it pagtapos it dag-unan nga Hajj ukon Islamic pilgrimage sa Mecca sa Saudi Arabia.
Bilang tradisyon it Eid’l Adha, nagakatay sanda it mga halal nga sapat kapareho it karnero, kanding baka ag camel.
Iya sa Aklan, baka sigon ro andang ginkatay para sa selebrasyon nga pagatunga-on sa tatlo nga ginaeakipan it pamilya, mga igbata ag amigo kamana man sa mga pigado ag nagakinahang’ean.
