KALIBO, Aklan—Haeos tanan nga mga nagapa-angkas sa motorsiklo sa probinsiya it Aklan hay nagasunod sa guidelines nga gintaeana it Inter-agency Task Force for the Management of Emerging Infectious Diseases (IATF-MEID).
Raya ro ginpahayag ni P/Capt. Nathaniel Florendo, hepe it Highway Patrol Group ukon HPG Aklan kasunod it mandu it Department of the Interior and Local Government (DILG) nga ginapasugtan eon nga mag-angkas sa motorsiklo ro mga mag-asawa, live-in partners ukon maskin ro magkaibahan sa baeay.
Ginklaru pa kara nga required sa gihapon ro pagbutang it protective shield sa tunga it daywang nakasakay basta nga bukon it magkaibahan sa sueod it baeay.
Mag-eowas kara, ro pagsuksok it face mask hay hugut sa gihapon nga ginapatuman it mga otoridad.
Kinahangean sigon nga magpakita it pruweba ro mga angkas kapareho it ID nga sanda hay mag-asawa, mag-live in ukon magkaibahan sa sangka baeay.
Dapat pareho ro address it mga raya.
Ro mga maga-eabag hay iga-turn over sa kapulisan para sa pagpapanaog it penalidad sa idaeum it reckless driving.
