KALIBO, Aklan—Nakabatun eun it andang first dose it COVID-19 vaccine ro mga Person Deprived of Liberty (PDL) sa Aklan District Jail.
Suno kay SJO3 Portia J Gerardo, OIC, Warden it Aklan District Jail Female Dormitory nga naturukan eun it andang first dose gamit ro bakuna nga himo it kompaniyang Pfizer ro mga PDL’s nga gustong magpabakuna.
May mga una man sigon nga nahadlukan sa injection rason nga nagpamalibad nga magpabakuna.
Apang antes man nagpatigayon it vaccination program ro Philippine Red Cross hay gin-impormahan eun sigon nanda ro mga PDL’s angot sa mga benipisyo nga andang puwedi nga maangkon kung mabakunahan kontra COVID-19.
Samtang, ginklaro pa kara nga may mando eun ro andang national office nga engkasong mabakunahan eun ro tanan nga mga PDL hay puwedi eun nga pagapasugtan ro face-to-face visitation apang owa it may matabong close contact ag kinahangean sa gihapon nga magsunod sa ginapatuman nga health and safety protocol.
