KALIBO, Aklan—Owa it Pilipinong naninahan ukon namatay sa wildfires nga nagapanaeasa makaron sa Los Angeles, California.
Suno kay Bombo International News Correspondent Jo Frias nga ro andang gina-istaran sa historic filipino town, Los Angeles hay bukon it apektado it mabahoe nga sunog .
Apang padayun pa sigon nga ginakumpirma ro impormasyon nga may pilang Pinoy ro na-trap sa nasunog nga baeay sa ibang parte it LA.
Suno kana nga maabu ro apektado, kaibahan ro maeahaeon nga baeay it pilang kilaeang Hollywood celebrities kaibahan ro kapin sa 10,000 structures eon ro nasamad bangud sa insidente kaibahan ro mga eskwelahan .
Padayun man sigon nga nagabueuligan ro mga awtoridad ag pilang mga pumeuyu agud nga matapna ro sunog sa lugar.
Sa pihak nga parte, ginpahayag ni Frias nga padayun ro anang trabaho bilang child care bangud nga owa man naapektuhan ro anang workplace apang may kahigayunan nga nakaka-abot kanda ro asu .
Samtang, nagtuhaw suno kana ro sunog bangud sa ginatawag nga santa ana wind ukon matsa bagyo nga sobra kabaskog ro hangin nga owa it uean .
Nakaangkon raya it friction nga nagresulta sa pagkaeayo it mga puno eabi eon sa nabukid nga parte bangud sa mabuhay nga tiempo nga owa nakaangkon it uean.
Haeos ro palibot it downtown Los Angeles suno kana hay gin-eamon eon it wildfire nga nagtuga it maeapnagon nga kahalitan ag napilitang magbakwit ro libu-libong katawo sa andang mga baeay nga ro kaabuan hay halin sa Pacific Palisades.
Minilyon man nga katawo sa Southern California ro naka-eksperyensiya it maeapnagon nga power interruption.
