KALIBO, Aklan—Bantay sarado sa gihapon ro mga sementeryo makaron nga adlaw it Nobyembre 2 sa selebrasyon it All Souls Day.
Suno kay P/Major Jason Belciña, acting chief of police it Kalibo Municipal Police Station nga padayun ro andang pag-inspeksyon sa mga pampubliko ag pribadong sementeryo sa banwa it Kalibo.
Tuyo sigon kara nga masiguro nga owa it sin-o man nga makulit nga magahana gihapon nga makasueod sa mga sementeryo.
Nasayuran nga base sa ginpaguwa nga executive order ni Kalibo Mayor Emerson Lachica , temporaryong ginpasaraduhan ro mga sementeryo umpisa ko Oktubre 29 hasta Nobyembre 2 agud nga malikawan ro pagdueutdutan it mga tawo.
Gindugang pa ni Major Belciña nga kaibahan nanda nga nakabantay ro mga katapo it Municipal Disaster Risk Reduction and Management Office ukon MDRRMO.
Sa pihak nga parte, ginpahayag dugang nga owa man it nailisang untoward incidents sa pagbuhos it mga tawo antes ro pagsarado sa mga sementeryo.
Magiging dere-deretso sigon ro andang hugut nga pagbantay hasta sa selebrasyon it paskwa ag bag-ong dag-on.
Sa pihak nga parte, ginpadumdum pa it opisyal sa publiko nga padayun ro pagsunod sa minimum health protocol bangud nga epektibo pa ro ginpaguwa nga executive order ni Aklan Governor Florencio Miraflores angot sa mga pagdahan kontra covid 19.
