KALIBO, Aklan—Nagapabilin nga bantay-sarado it mga kapulisan ro mga pampubliko ag pribadong sementeryo sa bilog nga probinsya it Aklan.
Raya hay kasunod it ginpagguwa nga Executive Order ni Aklan Governor Florencio Miraflores nga bawae anay ro pagbisita sa mga sementeryo umpisa Oktobre 29 hasta Nobyembre 2 kung siin suportado man raya it 17 ka mga alkalde it probinsya.
Suno kay Police Lieutenant Colonel Bernard Ufano it Aklan Police Provincial Office (APPO) nga tuyo kara nga malikawan ro pagtililipon it mga tawo ag maging super spreader event it COVID-19.
Nasayuran nga sigidas ro pag-monitor ag inspeksyon makaron it otoridad para masiguro ro implementasyon it pagbawae sa pagbisita sa mga nagtaliwan nga mahae sa kabuhi.
Mag-eowas kara, hugut man nga ginapatuman it mga otoridad ro pagbantay sa mga naga-eabag sa minimum health protocols kaibahan eon ro community quarantine rules ag local ordinances.
Dugang pa ni Ufano nga posibleng magpangatubang sa multa ro sin-o man nga mag-eabag sa nasambit nga direktiba.
