KALIBO, Aklan—Naga apela ro mga negosyante it talabahan sa Barangay Tambak, New Washington sa Bureau of Fisheries and Aquatic Resources ukon BFAR nga uman nga magpatigayon it testing agud nga matumod kon positibo gihapon sa paralytic shellfish poison ukon red tide toxin ro mga baybayon nga sakop it banwa ag Batan Bay.
Raya hay kasunod it ginpaguwa nga Shellfish Bulletin 20 it BFAR nga may petsang Agosto 26, 2023, kun sa siin pitong lugar sa Western Visayas ro nagpositibo sa shellfish toxin.
Kaibahan kara ro kaeawran nga sakop it Mambuquiao ag Camanci sa banwa it Batan; kamana man sa Altavas ag New Washington sa Batan Bay.
Suno sa negosyanteng si Shella Aguirre nga bangud sa pilang adlaw nga mga pag-uean-uean hay nagaeaum sanda nga gin-anod eon ro red tide sa mga baybayon.
Bangud sigon sa padayun nga kaso it red tide toxin, apektado eon ro andang negosyo nga kaeabanan nga ginadayo it mga turista halin sa metro manila ag kaiping nga mga probinsiya bangud sa matambok nga shellfish partikular ro taeaba, tahong ag iba pa.
Ginpahayag pa ni Aguirre nga haeos 80% it andang income ro naduea nga posibleng magaresulta sa andang pagkalugi kon magabuhay pa ro insidente.
Mag-eowas suno kana sa mga ginabayaran nga permit hay may tawuhan pa sanda nga ginaswelduhan.
Nasayuran nga pilang mga talabahan sa lugar ro nagsarado eon.
Nauna eon nga ginpahayag it BFAR nga uman sanda nga magabo-oe it water samples halin sa nasambit nga mga baybayon sa Setyembre 18 para sa re-test.
Sa makaron ro anda eon lang nga gina-serve sa mga customer hay ro isda, hipon ukon sugpo, alimango ag pusit nga eowas nga kaunon.
Owa sigon sanda it mahimo kundi nga sundon ro advise it FAR.
