KALIBO, Aklan — Nagapati si Atty. Axel Gonzales, political analyst sa Aklan nga puro mga opisyal it Department of Public Works and Highways (DPWH) at contractor eamang ro makasuhan it plunder nga may kahilabtanan sa mga maanomaliyang flood control ag iba pang infrastructure projects sa nasyon.
Bilang sangka abogado, igalaygay sigon nana sa mga nagatueur-an makaron nga mga taga DPWH ag kontratista nga ikanta eon ro andang mga nasayuran eabi eon sa mga ghost flood control project.
Sa pihak kara, nagapati imaw nga owa it sin-o man nga kongresista ag senador nga gindaeahig sa isyu ro makasuhan bangud sa kawad-an it mabug-at nga ebidensiya.
Medyu naging komedya suno kana ro nagakatabu sa hearing bangud nga mag-eowas nga nagatueur-an hay pabag-o bag-o ro statement it mga taga DPWH ag kontratista.
Sa mga nagakatabu, naging biktima ro mga Pilipino it kalokohan it mga pulitiko ag bulok nga pagdumaea it gobyerno.
Samtang, suno kay Atty. Gonzales nga ro pinaka-ugat it mga nagakatabu sa makaron hay bangud man sa kasae-anan it mga botante nga nagapasugot nga ibaligya ro andang boto kada eleksyon.
Suhestiyon pa nana nga agud nga matapna ro korapsyon sa mga proyekto, dapat nga maghimo it laye ro mga mamalidha nga naga-instrikto sa pag-award it mga kontrata.
Atty. Axel Gonzales, political analyst sa Aklan
