KALIBO, Aklan—Ginaplanuhan eon it lokal nga gobyerno it Kalibo ro mga tikang nga pagahimuon sa pag-rescue sa mga badjao nga kaeabanan nga makita sa mga nagapangunang karsadahon nga nagapakalimos.
Suno kay Municipal Disaster Risk Reduction and Management Office ukon MDRRMO-Kalibo head Terrence Toriano nga indi sanda basta-basta nga makahimo it operasyon kaibahan ro ginbilog nga task force ni Kalibo mayor Juris Sucro bangud sa posibilidad nga makaangkon it pag-einagsan nga masyadong delikado sa mga motorista ag sa mga gina-rescue nga badjao.
May nabaton man sigon sanda nga impormasyon nga naga-istar ro mga raya makaron sa kaiping nga banwa it Kalibo.
Nagaeaum ro LGU-Kalibo nga magahimo man it aksyon ro owa ginpangaeanan nga banwa agud nga matipon ag mahimos pauli sa andang natungdan nga lugar ro mga raya.
Sa pihak nga parte, nagakabaeaka man ro mga otoridad sa nabaton nga balita nga gina-alegar nga gina-recruit ro mga badjao it sangka leftist group sa Aklan.
Nasayuran nga mag-eowas sa pagpakalimos, modus man it mga badjao nga nagabaligya it pilang mga items nga ginaka-irita it iba bangud sa andang pagiging pilitaryo.
May kahigayunan nga nagapang-“pila” ro mga raya nga masyadong delikado makaron nga tiempo bangud sa covid 19.
Ginatan-aw man ro posibilidad nga may sindikatong sa likod it uman nga pagtuhaw it mga Badjao sa Kalibo ukon may financier nga nagbayad it andang pamasahe.
Nauna eon nga ginpahayag ni DSWD Sec. Erwin Tulfo nga naga abot sa haeos P5,000 pesos ro kita sa pagpakalimos it mga badjao partikular sa Metro Manila.
