KALIBO, Aklan–Gina-agi eon lang it mga tricycle driver sa paghinyu sa andang mga pasahero agud nga makabawi ro mga raya sa pagtaas sa presyo it mga produktong petrolyo eabi eon ro gasolina.
Suno kay Rafael Quimpo, driver it GTODA ukon biyaheng Guinbaliwan, New Washington nga raya eon lang ro andang nakikitang pamaagi makaron agud nga maeampasan ro kada adlaw ag may iga-uli sa andang natungdan nga pamilya.
Indi man sigon sanda basta-basta nga makapasaka it pamasahe bangud sa owa it taripa nga ginabuytan.
Kanya-kanyang diskarte eon lang ro andang gina-obra agud nga makaeampuwas sa haeos kada domingo nga oil price hike.
Nagakabaeaka man sanda nga kon magapadayon ro makarondaya nga sitwasyon ag owa it tikang nga paga obrahon ro gobyermo hay panigurado nga owa eon sanda it pagakitaon.
Sa makaron hay naga-abot sa 60 pesos ro andang ginasukot nga pamasahe bangud sa limitadong pasahero kumpara sa dati nga P24 bangud nga P40 pa eamang kato ro kada litro it gasolina.
Kabay suno kana nga mataw-an man sanda it fuel subsidy.
Nagahinyu man sanda sa mga pasahero nga intindihon ro andang kahimtangan.
