Kalibo Aklan ——Ginsuhestiyon ni Kalibo Sangguniang Bayan Member Augusto Tolentino sa mga tricycle operators ag drivers nga imbes nga magpasaka it petition sa konseho hay mas mayad nga makaangkon eon lang it kasugtanan sa andang pasahero angot sa andang ginapangayo nga pamasahe .
Raya hay bangud nga masyado sigon nga maeawig nga proseso ro pag-obra it ordinansa may kaangtanan kara.
Gindugang pa ni Tolentino nga owa man ginapasugtan ro fare increase nga masyadong mataas ukon doble sa presenteng pamasahe .
Nasayuran nga ko Mayo 22, nagpasaka it petisyon sa SB ro Federation of Kalibo Tricycle Operators and Drivers Association, Inc. (FOKTODAI) nga taw-an sanda it provisional increase sa pamasahe sa tricycle agud nga makabawi sa tunga it naexperiensiyahan nga coronavirus disease (COVID-19) pandemic .
Ginaproponer nanda ro fare increase nga haeos doble sa naga-eksister makaron nga pamasahe sa kada pasahero .
Bangud nga daywang pasahero eamang ro ginapasugtan nga makasakay sa tricycle bilang pagsunod sa social distancing, ginaduso it mga drivers ro 18 pesos nga pamasahe .
Reklamo pa it mga drivers nga apektado man ro andang pagpamasada bangud sa ginapatuman nga curfew ag amat amat eon man nga pagtaas it presyo it produktong petrolyo .
Kadungan kara, nag-apela ro opisyal sa publiko nga intindihon anay ro sitwasyon makaron it mga drivers.
