KALIBO, Aklan—Libu-libong nga mga local ag foreign tourist ro bumuhos sa Isla it Boracay agud nga saksihan ro dag-unan nga selebrasyon it Boracay White Beach Festival 2024.
Suno kay Ms. Kathrine Licerio, tagapaghambae it Malay Tourism Office nga umpisa nga ginpatigayon ro mga events ko Oktubre 11 hay indi magnaba sa 5,000 nga mga bisita ro nagabakasyon sa isla kada adlaw.
Nasayuran nga pila sa mga participants sa nagkaeain-eain nga mga events kapareho it beach tennis hay mga dumueuong .
Raya eon ro ikaywang dag-on nga ginpatigayon ro festival bilang sangka tikang agud nga mas pang mapabaskog ro industriya it turismo sa Boracay.
Kaibahan sa mga nagapangunang aktrasyon sa selebrasyon hay ro beach foam party , sand castle festival , paraw sailing , ag ro pagpatigayon it Mr. Grand Philippines 2024 fashion show and swimwear competition.
Magatapos ro selebrasyon sa Oktubre 31 kun sa siin pila pa sa mga nakalinyada nga mga aktibidades hay ro food bazaar, international dragon boat race, beach volleyball international, beach football, beach Frisbee, ag ro kauna-unahan nga beach basketball .
Ro nasambit nga festival hay ginapatigayon kada Oktubre sandig sa sangka municipal ordinance bilang simbolo nga ro banwa it Malay hay bugana sa pamanang pandagat ag cultural identity.
