KALIBO, Aklan—Sigidas makaron ro ginahimo nga preparasyon it Municipal Health Office (MHO)-Kalibo para sa igapatigayun nga tatlong adlaw nga national vaccination drive halin Nobyembre 29 hasta Disyembre 1.
Suno kay Hernan Lorenz Laserna, Nurse II it MHO-Kalibo, ro unang adaw it maeapnagon nga bakunahan hay igataeana nanda para sa pediatric ag adult population.
Samtang, ro pagbakuna sa Nobyembre 30 hay ginpakamayad sigon nanda nga gin-isoe sa Disyembre 1 ag 2.
Target sigon nanda nga makabakuna it 1,000 nga mga indibidwal sa sueod it sang adlaw para sa madasig nga pag-rollout it bakuna.
Positibo si Laserna nga sarang nanda maabot ro target numbers of vaccinee nga gintaeana sa Kalibo.
Raya suno kana hay bukas sa tanan nga naga-edad 12 hasta 17 anyos ag 18 anyos pataas nga mga pumueoyo.
Gina-engganyo man ro tanan nga owa pa nabakunahan sa nasambit nga age group nga magpabakuna eon para maproteksyonan ro pamilya ag komunidad kontra sa COVID-19 ag iba pang variants.
Ro kinahang-ean eamang sigon nga daehon it mga walk in vaccinee hay sangka valid ID samtang dapat nga may kaibahan nga ginikanan ukon guardian ro mga naeakip sa pediatric population kamana man nga magdaea it Birth Certificate.
Ro importante sigon hay may sakto nga tueog ag busog ro mga nagapabakuna.
Dugang pa kara nga nagapatigayun sanda it massive information campaign sa mga kabarangayan para ma-engganyo ro mga pumueoyo nga magpabakuna.
Sa makaron, 54 porsyento pa eamang it kabilugan nga populasyon ro nabakunahan sa Kalibo kung siin maeayo pa raya para maabot ro ginahandom nga herd immunity.
Matueopangdan nga target it gobyerno nga makahimo it 5 million jabs kada adlaw ukon 15 million nga mabakunahan sa sueod it tatlong adlaw nga Bayanihan, Bakunahan National COVID-19 Vaccination Days.
