BALITANG Espesyal —- Sangka maisot nga creature nga nakit-an sa Sydney, Australia ro palaisipan makaron sa mga biologists, academics ag netizens bangud sa kakaiba ag misteryosong itsura kara.
Ko agahon it Marso 2, 2022, naga-jogging sa Marrickville suburbs si Harry Hayes kat may nataeupangdan imaw nga maisot nga sapat nga nagahamyangon sa karsada .
Bangud sa tumaeagsahon nga itsura, ginboe-an nana raya it video para i-post sa anang Instagram account.
Bangud nga maabu ro na-curious sa anang video, pila sa mga nakakita hay gin-repost ag ginpakalhit sa ibang social media websites kapareho it Twitter ag Facebook nga naging rason agud nga mag-viral ag istoryahan raya it kaabuan.
Makita sa nasambit nga video nga ginatuslok-tuslok raya ni Hayes gamit ro stick agud nga makita kun makaangkon it reaction ro sapat apang owa raya nag-react ag posibleng patay eon.
Suno kay Hayes, una nana nga gindudahan nga embryo raya it sangka sea animal nga daea it mabaskog nga pag-uean ag flash flood sa Sydney ko Marso 1.
Apang pagduda man ni Hayes nga raya hay sangka alien.
Kat ginpangutana kon ham-an nga sa tan-aw nana nga raya hay sangka alien, ro sabat ni Hayes hay sa sobrang kaabuon it kinagamo nga nagakatabu sa kalibutan kapareho it COVID-19 pandemic ag giyera sa Ukraine, bukon eon it imposible nga sakupon man kita it mga alien.
Nakaabot sa mga siyentipiko ag propesor it mga sikat nga unibersidad sa Australia ro video ag hasta sa makaron, owa kanda it makatau it klaru nga sabat kon ano ro nasambit nga sapat .
