BALITANG Espesyal — Sangka 39-anyos nga babaying model sa Japan ro nag-aku sa sangka television interview nga umabot eon sa 30 million yen ukon katumbas it P13 million pesos ro anang nagastos sa pagparetoke.
Sa nagtaliwan nga daywang dekada, 300 beses eon nga nagparetoke ro modelong si Tsubaki Tomomi.
Suno sa anang interview, ro obsesyon nana nga magpagwapa hay naghalin sa pagpintas sa anang itsura it ana mismo nga ina .
Umpisa sa pagka-unga, pirmeng nagareklamo ro anang ina sa atubang ot ibang tawo angot sa anang bukon it manami nga itsura .
Bangud kara, 18-anyos pa eamang si Tomomi hay nagpaidaeum eon imaw sa pinakauna nana nga plastic surgery, ro blepharoplasty ukon double eyelid surgery.
Kat mag-21-anyos ag nakaangkon it stable income, naging rason raya agud nga maabu pa imaw nga ipa-obra sa anang eawas kapareho it rhinoplasty, eye shaping surgery ag breast implants.
Sa edad nga 39, owa pa it plano nga magpundo si Tomomi sa pagparetoke.
Suno kana , nalipay imaw bangud nga makaron nga tiempo hay normal eon ro magpa-retoke bukon it kapareho kato nga gina-chismisan kon masayuran nga retokado ro sangka tawo.
Sa makaron, nagatrabaho gihapon bilang modelo si Tomomi ag sambilog eon man imaw nga content creator ag social media influencer sa Instagram, Twitter, Facebook ag Japanese blog site nga Ameba.
Owa man namitlang ni Tomomi kun gina-pintasan pa imaw makaron it anang ina.
