KALIBO, Aklan—Nakaangkon it pilang ka mga lastro sa kaeawasan ro sangka motorista matapos nga bumangga sa nakaparada nga truck sa Diversion Road it banwa it Makato.
Base sa inisyal nga imbestigasyon it Makato Municipal Police Station, halin sa Bacolod City ro truck nga ginamaneho ni Antonio Capiga, 49-anyos, tumandok it San Carlos City, Cebu kung siin may kaibahan raya nga daywang pahinante ag magapaadto kunta sa Las Piñas.
Ginasugid nga maayos nga nakaparada ro behikulo sa kilid it diversion road kat gulpi eamang bumangga ro motorsiklo nga ginamaneho ni Kenneth Fontillas, residente it Sitio Hagakhak, Brgy. Baybay, Makato.
Si Fontillas hay nag-angkon it pilang ka mga lastro sa eawas ag gilayon nga gindaea sa ospital para sa nagakaigo nga medikasyon.
Samtang, ro driver it truck ag ro daywang pahinante kara hay insigida man nga ginpahilway.
Ro nasambit nga behikulo hay may kargang 400 nga kanding nga igabiyahe sa bahin it Las Piñas.
