Sangka lola sa Indonesia nga pilang adlaw eon nga gina-usoy it anang pamilya ro nakit-an nga sa sueod it tiyan it sangka 22 feet nga sawa!
Ulihing nakitang buhi ro 54-anyos nga si Jarah it anang asawa ko Oktubre 21.
Paagto raya sa gina-obrahan nana nga rubber plantation nga maeapit eamang sa andang baeay sa Jambi, Sumatra.
Kat owa eon raya naka uli it gabi-i ngato, nagpangayo eon it bulig sa awtoridad ro pamilya ni Jarah.
Ko gabi-i nga gin-usoy si Jarah, ro nakita eamang it search party sa kagueangan hay ro sapatos, jacket ag headscarf.
Pag-abot it agahon it Oktubre 23, may nakit-an ro search party nga sangka reticulated python nga may habang 22 feet.
Nagabukoe ro anang eawas nga medyu may mabahoe nga sapat nga ginkaon.
Mabahoe ro pagduda it search party nga raya ro suspek sa pagkaduea ni Jarah rason nga ginpatay nanda ro sawa ag dayun nga ginbuksan ro anang tiyan.
Shock sanda nga nakita sa tiyan it sawa ro eawas it lola ag bilog pa ro anang eawas.
Bangud sa natabu sa lola, ginputos it pagkabaeala ro mga residente it Jambi eabi pa ag napabalita nga may nakita pang mas mabahoe nga sawa nga may habang 27 feet nga nagadisturbo sa andang lugar.
