KALIBO, Aklan—Nag-abot eon sa 126,328 ro numero it mga estudyante nga nag-enroll para sa School Year 2022-2023 sa bilog nga probinsiya it Aklan.
Suno kay Dr. Hernani Escullar Jr., tagapaghambae it Department of Education ukon DepEd Region 6, sa ginpaguwa nga datos it Department of Education ukon DepEd Region 6 hasta alas-8:00, Huwebes it agahon, Agosto 18, kapin sa 62,209 ro total enrollment sa Kindergarten hasta Grade 6; sa Grade 7 to 10, nakalista it 41,644 samtang sa Grade 11 hay may una nga 11,639 ag sa Grade 12 hay 10,836.
Sa pihak nga parte, sa bilog nga western visayas, kapin sa 1,690,063 ro nailistang enrollees.
Sa nasambit nga numero, 1,531,378 ro nakapag-enroll nga estudyante sa mga pampublikong eskwelahan, 155,493 sa mga pribadong eskwelahan, samtang 3,192 man sa SUCs ukon LUCs nga naga-offer it mga basic education.
Ginpadumdum it DepEd, may tatlong pamaagi sa pagpa-enroll.
Raya hay in-person, remote ukon online, ag drop box enrollment.
Para man sa Alternative Learning System ukon ALS learners, pwede man nga magpalista it in-person ukon digital.
Gindugang pa ni Dr. Escullar nga ginaeauman nga magataas pa ro nasambit nga numero bangud nga magapadayun pa ro enrollment hasta sa Agosto 22, 2022.
Kumpara ko nagtaliwan nga school year, nagnaba makaron ro enrollment it masobra sa 400,000.
Samtang, ginklaru man kara nga padayun nanda nga ginapatuman ro “no collection policy” sa pagpa-enroll it mga estudyante.
