KALIBO, Aklan—Naga abot eon sa 3,528 ro household nga nag-graduate sa Pantawid Pamilyang Pilipino Program ukon 4P’s it Department of Social Welfare and Development ukon DSWD sa probinsiya it Aklan.
Suno kay Beverly Salazar, provincial link it DSWD-Aklan nga 775 nga household ro nag-exit ko nagtaliwan nga dag-on sa programa matapos nga owa eon sanda it mga unga nga naga-edad it 0 to 18 years old ag naka abot eon sa level 3 ukon naging maayos eon ro andang pagpangabuhi.
Ko Abril it makaron nga dag-on hay nag abot sa 761 ro nag-graduate sa programa samtang sa Nobyembre 29 hay nakataeaana nga maga exit ro naeakip sa batch 3 nga naga abot sa 1,992.
Ginpahayag dugang nga ro Aklan eamang sa bilog nga nasyon ro nagapatigayon it dueueungan nga graduation sa bilog nga probinsiya nga ginatawag nanda nga “ani”.
Ginakilaea ag ginapasaeamatan man it DSWD ro mga local government units bangud sa suporta ag maayos nga implementasyon it 4Ps.
Mag-eowas sa voluntary exit hay may iba pang mga pamaagi kon ham-an nga ginabo-oe ro sangka benepisyaryo sa Pantawid Program base sa Republic Act 11310 ukon 4Ps Act.
Una kara hay ro automatic exit ukon ginabo-oe eagi ro sangka household kun ro ginamonitor nga estudyante sa sangka pamilya hay nag abot eon sa 19-anyos ukon nakapagtapos eon it high school.
Limitado eamang sa pitong dag-on ro pagtinir sa programa agud nga mataw-an man it bulig ro ibang pamilya nga nagakinahangean kara ag ro saea nga paggamit it cash grant ukon ginagastos raya sa sugae, aeak ag maging ro paggamit it illegal nga droga.
Ro mga nag graduate nga household hay padayun nga ginabuligan it DSWD pinaagi sa livelihood opportunities.
