KALIBO, Aklan—Naga-abot eon sa 10 ro napasakaan it kaso it Land Transportation Office ukon LTO-Aklan umpisa nga ginpabaskog ro implementasyon it laye kontra sa pagmaneho nga hilong.
Suno kay LTO-Aklan head Engr. Marlon Velez nga nagtingub sanda it pwersa it Aklan Police Provincial Office para sa nasambit nga aktibidad.
Angot kara, nagpaandam imaw sa mga motorista nga likawan nga magmaneho it hilong agud nga makalikaw sa kasong pag-eabag sa RA 10586, ukon ro Act Penalizing Persons Driving under the Influence of Alcohol, Dangerous Drugs and other Similar Substances.
Nasayuran nga gin-umpisahan eon it LTO-Aklan ro paggamit it mga alcohol breath analyzer test sa mga motoristang ginadudahan nga nagamaneho nga hilong.
Sa idaeum it RA 10586, ro mga motorista nga makasakit sa iba bangud sa pag-drive it hilong hay pagamultahan it P20,000 hasta P80,000 pesos ag pagkakulong it hasta tatlong buean.
Samtang ro hilong nga driver nga makadisgrasya ag makapatay hay pwedeng makulong it hasta 20 anyos ag may multang P300,000 hasta P500,000 pesos.
