KALIBO, Aklan—Naga-abot eon sa 17 nga negosyante ro nagbo-oe it Fire Safety Inspection Certificate para sa pagbaligya it paeupok sa nagahilapit nga pagsug-aeaw it Bag-ong Dag-on sa banwa it Numancia.
Suno kay SFO2 Richie Anthony del Rosario, Deputy for Operations it Bureau of Fire Protection ukon BFP-Numancia nga ginaeauman nga madugangan pa ro nasambit nga numero bangud nga 23 suno kana ro nagpahayag it interes nga magabaligya it paeupok.
Dapat sigon nga magbo-oe anay it mga permit sa andang ahensiya antes nga pasugtan nga makabaligya it firecrackers ag pyrotechnics.
Raya hay base sa memorandum circular 2016-176 it Department of the Interior and Local Government.
Ginpahayag dugang nga kinahangean nga nakasunod sa mga guidelines it Fire Code of the Philippines ro mga stalls ukon ginabaligyaan it mga paeupok.
Tuyo kara nga maging eowas sa sunog.
Nasayuran nga sa Barangay Laguinbanua East Numancia ro gintaeana nga lugar agud nga baligyaan it paeupok nga maga-umpisa sa Disyembre 28 hasta 31.
Sa makaron pila sa mga negosyante hay naga-umpisa eon nga mag-construct it andang mga stalls nga nakataeana nanda nga igapaidaeum sa inspection antes nga maka-umpisa nga magbaligya.
Ginpadumdum pa ni SFO2 del Rosario nga may nagakaigo nga penalidad ro sin-o man nga madakpan nga nagabaligya it iligal nga paeupok.
mag-eowas sa multa ag pagkakulong, pagakumpiskahon man ro andang mga baligya ag pagakanselahon ro business permit.
