KALIBO, Aklan—Naga-abot sa P440 pesos hasta P550 pesos ro presyo it kada kilo it puea nga sibuyas ukon sibuyas bombay sa Kalibo public market.
Raya ro ginpahayag ni Project Evaluation Officer I Roselyn Relado it Office of the Provincial Agriculturist sa ginpatigayon nga price monitoring.
Suno kana nga ginaeauman nga amat-amat eon nga maganaba ro presyo kara tuga it pagsangkiri it demand kumpara ko tiempo it paskwa ag bag-ong dag-on.
Ro sibuyas taal ukon maintok nga klase it sibuyas hay mas barato sa presyong P270 pesos hasta P280 pesos.
Sa pihak nga parte, ro presyo it iba pang panakot kapareho it bawang hay nagahampang sa P100 pesos per kilo; euy-a, P60 pesos per kilo; siling labuyo, P650 pesos samtang ro siling haba hay P150 pesos hasta P200 pesos ag ro sweet pepper hay P350 pesos hasta P450 pesos per kilo.
Sa fishery products, ro presyo man it bang-eos hay naga-abot sa P180 pesos hasta P220 pesos per kilo depende sa kabahoe; ro tilapia hay P120 pesos per kilo ag ro sapsap hay P160 pesos per kilo.
Nataeupangdan suno kana ro kawad-an it supply it mga isda kapareho it tamban, galunggong ag hasa-hasa bangud sa mabaskog nga panganod.
Samtang sa poultry ag livestock products, ro karne it baka hay naga abot sa P340 pesos hasta P350 pesos per kilo; ro karne it baboy hay P200 pesos hasta P220 pesos kada kilo ag ro liempo hay P240 pesos kada kilo.
Gindugang pa ni Relado nga kapareho it sibuyas hay nagtaas man ro presyo it manok bangud sa demand kara ko holiday season nga ro presyo hay naga abot sa P200 pesos per kilo ag native chicken hay P320 pesos.
Sambilog pa suno kana sa hugut nanda nga ginabantayan makaron hay ro presyo it itlog nga P8 pesos eon ro medium size.
