MALAY, Aklan—Uwa pa it fare increase nga ginapatuman makaron sa mga motorbanca nga naga-eayag maghalin sa Caticlan port patabok sa isla it Boracay vice versa.
Raya ro ginpahayag ni Caticlan Boracay Transport Multi-Purpose Cooperative (CBTMPC) consultant Godofredo Sadiasa sa pihak it gulpihan ag mabahuean nga pagtaas it presyo it produktong petrolyo.
Suno kana, may kaugalingon sanda nga gasoline station ag ro andang pamasahe hay regulated it Maritime Industry Authority ukon MARINA.
Dugang pa nana, kinahang-ean pa nanda nga magsueat ukon magrequest it provisional fare increase sa MARINA.
Uwa sigon nagabakae it krudo ro mga bangka kundi nagasag-ob eamang ro mga raya sa andang gasoline station ag ro bayad hay magahalin sa andang kita sa adlaw-adlaw nga pag-eayag.
Apang, maskin makaraya ro andang presenteng sitwasyon hay may epekto gihapon raya bangud sa posibleng mabuhinan ro kita it mga bangkero adlaw-adlaw.
Kon engkaso nga mataas ro presyo it masunod nanda nga delivery hay mabahoe man ro magiging buhin kara sa andang sales ag raya makaron ro andang concern bangud nga pati ro kita nanda may maapektuhan.
Apang kon supply ro pagahambaean hay bastante ro andang supply apang posibleng makaangkon man it adjustments.
