KALIBO, Aklan—Ginpamalibaran it Batan Municipal Police Station ro nagakalhit nga post sa social media angot sa nagapangbo-oe sigon it mga unga nga sakay it sangka saeakyan sa nasambit nga banwa .
Sa interview it Bombo Radyo kay P/Capt. Gilbert Batiles, hepe it Batan MPS, ginpahayag nana nga fake news ro nagakalhit nga impormasyon.
Dugang pa kara nga luma eon ro nasambit nga peke nga impormasyon nga matsa “copy cat” ukon ginkopya eamang sa ibang mga lugar, apang owa man it kamatuoran.
Naintindihan sigon nana ro pagkabaeaka it mga ginikanan nga nagapalhit it kapareho nga impormasyon , apang kinahangean nga i-verify anay antes nga i-post ukon i-share sa social media.
Gin-insister pa ni Capt. Batiles nga may nagakalhit sanda nga mga kapulisan ag patrol cars agud nga magbantay sa mga estratehikong lugar partikular sa Batan Elementary School rason nga na-monitor nanda ro mga nagakatabu.
Nagpaandam man imaw nga pwedeng makasuhan ro mga nagapakalhit it fake news kadungan ro pagpadumdum sa publiko nga indi basta-basta nga magpati sa mga nagapakalhit it mga makarondaya nga impormasyon.
May tamang ahensiya suno kana nga nagapaguwa it mga warning sa publiko.
Sa nasambit nga post, gina-alegar nga nakita ro pilang mga unga sa sueod it saeakyan nga nagatinangis ag may tabon ro baba.
