KALIBO, Aklan—Makabig nga synchronized funded protest ro nagakatabu makaron nga hub-eag protesta sa mga nagapangunang unibersidad sa Estados Unidos nga nagresulta sa pagka-aresto it ginatos nga mga estudyante.
Suno kay Bombo International Correspondent Pinoy Gonzales sa Texas, USA nga nagapati ro mga awtoridad nga may nagtau it pondo agud nga magpatigayon it pro-palestinian protests kun sa siin raya hay gin-umpisahan sa Columbia University sa New York ko nagtaliwan nga mga inadlaw.
Ro ginasinggitan sigon it mga nagaprotesta sa Gaza ag mga eskwelahan sa Estados Unidos hay may pareho nga demand kun sa siin ro ginaturo nga nagasoesoe hay mga Hamas.
Bangud sa insidente, masobra sa 100 nga mga estudyante nga Israeli ro nagsueat sa andang school authorities matapos nga makabatyag nga bukon eon sanda it eowas sa andang campus sa mga nagakatabu.
Nagpasa eon man suno kana it resolusyon ro policy-making body nga ginaeakipan it mga faculty, estudyante ag administrative staff nga nagamandu sa senado nga magpatigayon it imbestigasyon sa mga nagadumaea it eskwelahan agud nga matumod kon sin-o ro nagabuyot ukon nagapanguna sa mga protesta.
Suno kay Gonzales nga gina-hinyu it mga nagaprotesta sa Columbia nga putueon ro pakikipag-angot it mga eskwelahan sa Israeli academic institutions kamana man nga boe-on ro investments sa mga kompaniya nga may kaangtanan sa Israel.
Raya hay kasunod sigon it padayun nga pagtaas it numero it mga nagakamatay bangud sa pagpamomba sa Gaza.
