KALIBO, Aklan—Nagapadayun makarun ro monitoring it Local Government Unit (LGU) matapos magpositibo ro sambilog sa mga residente it Brgy. Bakhaw Norte, Kalibo.
Suno kay Punong Brgy. Maribeth Cual it Brgy. Bakhaw Norte nga umpisa kahapon hay nagpangutana eun sanda sa mga pomoeuyo kung sanday sin-o ro nakaangkon it close contact sa sangka laboratory staff it Aklan provincial hospital nga nagpositibo sa coronavirus disease (COVID-19) ag residente it nasambit nga lugar.
Sa makarun hay ginatinguhaan nandang mata-o ro tanan nga kinahang-eanon it mga apektadong indibidwal agud masiguro nga ginasunod ro ginapatuman nga minimun health standard.
Raya hay bangud nga indi eun makasueod sa andang trabaho matapos ginpaidaeum sa mandatory nga strict home quarantine.
Ginapahayag dugang nga sambilog eamang ro kumpiramdong kaso it COVID-19 sa anang barangay samtang ro sambilog hay supected ag ginahueat pa ro resulta it RT-PCR test.
Hugot man makarun ro monitoring it Rural Health Unit sa pamilya ag mga naclose contact it nasambit nga pasyente.
Samtang ginkasubo man kara ro nagakatabong diskriminasyon sa tunga it anang mga pomoeuyo ag iba pang mga residente.
Masakit sigon para kanda nga may mga establisiyementong ginabawaean sandang makasueod agud makapamakae it pagkaon.
Gin-insister dugang nga owa it dapat nga ikahadlok ro publiko sa andang mga pomoeuyo bangud nga sanda hay nagasunod man sa mga minimun health standard nga gintaeana it Department of Health (DOH).
