KALIBO, Aklan—Nagpanindugan si Kalibo Sr. Sto. Nino Ati-Atihan Management Council, Inc. ukon KASSAMACO president Editha Ureta-Reyes nga nag-agi sa sangka external auditor ro andang ginsumite nga financial report nga nagakahueugan nga may nagakaigo nga dokumento kapareho it mga resibo ag kontrata.
Ginpahayag dugang nga ro andang source of fund hay gin-utang ag owa it anuman nga kantidad nga gintau kanda ro LGU-Kalibo.
Raya hay kabaliskaran sa pahayag sigon it sangka konsehal nga may gintau kanda nga kapin sa 8 million pesos.
Samtang, ginpahayag pa ni reyes nga may separadong resibo ro ginbayad para sa permit and lisences it LGU pinaagi sa MEEDO ag accreditation fee nga para sa andang taeatapan.
Raya hay angot sa ginakwestiyon nga stall collections sa Magsaysay at Pastrana Park , mga kiosko, push cart ag iba pa.
Gindugang pa kara nga antes nga mag isyu it official receipts hay nagatau anay sanda it acknowledgement receipts.
Nag abot eamang suno kana sa masobra sa 706,000 pesos ro hagastos sa Miss Kalibo Ati-Atihan pageant, kun sa siin, ro ginakwestiyon nga masobra sa 1.8-million pesos hay estimate eamang.
Ro committee on ati atihan ro in charge suno kana sa kontrata sa mga gin imbitahan nga celebrity hosts, singers ag judges.
