KALIBO, Aklan — Paga kasuhan it Department of Environment and Natural Resources (DENR), LGU-Kalibo ag barangay council ro mga responsabling iligal nga nagpilak it trak-trak nga higku maghalin sa septic tank sa isla it Boracay sa sangka pribadong eugta sa Sitio Guba, Barangay Tigayon, Kalibo, Aklan.
Sa interview it Bombo Radyo Kalibo, gin pahayag ni John Peter Madula, head enforcer it Solid Waste Management Unit it LGU-Kalibo nga plano nandang kasuhan ro Boracay Island Water Company Treatment Plant, ro naka-kontratang sewerage operator sa isla ag hauling company nga naghakot it mga higku.
Gin pilak sigon ro mga sludge ukon eapok maeapit sa Aklan River nga gina boe-an it tubi it water district.
Gina kahadlukan nga magkalhit ro higku eangkaso nga bumaha sa banwa it Kalibo.
Nasayuran nga ro haeos 10 trak it higku hay naghalin sa treated sewage nga gin umpisahang hakuton ku nagtaliwan pang Nobyembre 9.
