KALIBO, Aklan — Ginkumpirma it lokal nga gobyerno it Kalibo nga uman nga magapasundayag sa Kalibo Ati-Atihan opening salvo, Sabado, Oktubre 5 ro dating nagrambolan nga Lagalag ag Bayangan drum and lyre group ko nagtaliwan nga Ati-Atihan festival.
Suno kay Mark Sy, head it barangay affairs it LGU-Kalibo nga nauna eon nga nag-atubang ro daywang grupo ko nagtaliwan nga buean agud nga maayos ro andang owa pagka-ilintindihan .
Ro settlement hay ginsaksihan nanday Kalibo mayor Juris Sucro ag Lezo Mayor Mary Lynette Fernandez .
Madumduman nga bangud sa insidente, nagpaguwa si Mayor Sucro it executive order angot sa pag-ban sa daywang grupo sa pagpasakop sa tanan nga sadsad ag merrymaking activities may kaangtanan sa Kalibo Señor Sto. Niño Ati-Atihan Festival.
Nasayuran nga nag viral sa social media ro mga videos ag litrato it daywang grupo matapos nga physical nga nagsaeakitan sa kada isaea sa katung-anan it pagsadsad sa 19 Martyrs Street Kalibo.
Ginbatikos ro daywang grupo bangud nga owa sigon nanda gin-isip nga ro event hay sangka religious activity.
Nagaeaum man ro LGU nga maging madinaeag-on ag maayos ro pagahiwaton nga opening salvo nga gin-umpisahan ro mga aktibidad kahapon nga adlaw it Biyernes sa Bisperas de Salvo .
