KALIBO, Aklan—Ginakabaeak-an makaron it mga pumueoyo ro natabo nga data breach matapos nga ma-hack ro Optus telecom sa Australia.
Ro Optus telecom hay ro ikaywang pinakamabahoe nga Australian based telecom nga ginapanag-iyahan it Singapore telecom.
Ginpahayag ni Bombo International Correspondent Denmark Suede it Sydney, Australia nga engkaso nga mag-leak ro pilang personal information hay posible raya nga takawon it mga hacker nga maga-resulta it identity theft.
Buot hambaeon, pwedeng gamiton it mga tawo sa likod kara ro personal data it sangka indibidwal sa pagpatigayun it mga loan transaction.
Gina-imbestigahan eon man suno kana it mga otoridad ro natabo nga date breach kung siin may sangka teenager nga nadakpan nga ginatakaw ro pilang data halin sa Optus telecom.
Ginapanan-aw nga magadaea raya it pilang bilyong dolyar nga payout sa mga apektadong costumer.
Sa makaron hay nagapadayun pa ro operation it nasambit nga kompanya apang ro andang costumer base ag advertising ahy siguradong maapektuhan.
