KALIBO, Aklan—Nagapanguna gihapon ro negros occidental sa listahan it maabu nga mga armas nga nakumpiska sa nagapadayon nga gun ban it Commission on Elections ukon Comelec hasta Marso 1.
Suno kay P/Lt. Col. Arnel Solis , tagapaghambae it Police Regional Office ukon PRO-6, base sa andang datos, naga-abot sa 73 nga nagkaeain-eain nga armas ag 40 nga deadly weapons ro nakumpiska sa mga ginpatigayon nga operasyon sa bilog nga Western Visayas.
Mag-eowas kara, ro negros occidental man ro may pinaka-maabu nga gun ban violators halin sa 88 nga indibidwal nga nadakpan.
Sa nasambit nga numero, 37 ro naghalin sa negros occidental, 16 sa probinsiya it Iloilo, 10 sa Aklan, 9 sa Iloilo city, 8 sa Bacolod city, ap-at sa Capiz, tatlo sa Antique ag sambilog sa Guimaras.
Pila sa mga raya hay nadakpan sa Comelec checkpoint samtang ro iba hay nadakpan sa pagresponde it kapulisan.
Uman nga ginpadumdum ni Solis ro publiko nga bawae ro magdaea it armas ag mga mataeum nga hinganiban sa mga pampublikong lugar mag-eowas kon may ginabuytan nga Certificate of Authority halin sa Committee on the Ban in Firearms and Security Concern.
Padayun sigon nanda nga ginapabaskog ro kampanya sa gun ban sa bilog nga rehiyon sais para sa eowas ag matawhay nga pagpatigayon it eleksyon sa Mayo 9.
Sa pihak nga parte, gindugang pa ni Solis nga naga-abot sa 140 nga covenant signing activities ro andang natapos sa bilog nga Western Visayas kaibahan ro mga political candidates nga nagapadaeagan sa nagkaeain-eain nga posisyon.
Tuyo kara nga makaangkon it malimpyo, maayos ag malinong nga eleksyon.
Ro covenant signing hay ginpangunahan it PNP sa bulig it Commission on Elections ukon Comelec.
Naging kaparte man it aktibidad ro Armed Forces of the Philippines ag religious sector.
Mag-eowas kara, naglunsar man sanda it ‘Kasimbayanan’ ukon Kawani, Simbahan at Pamayanan para sa kaparehong katuyuan.
