KALIBO, Aklan—Nagpanawagan ro National Irrigation Administration ukon NIA Aklan sa mga mangunguma angot sa problema sa patubi sa mga ueumhan sa eastern side it probinsiya it Aklan maskin nga bastante ro tubi sa andang water source.
Ginpaathag ni Jaime Relator Ibardolasa, senior water resources facilities technician it NIA-Aklan sa eastern side nga owa it disiplina ro pilang mga mangunguma.
Suno kana nga ginabaeabagan it pilang mga mangunguma sa unahan ukon ibabaw ro mga irrigasyon agud nga makasueod kanda ro tubi nga nagiging rason agud nga indi raya maka-abot sa punta.
Raya sigon ro rason kon ham-an nga may pilang mga mangunguma nga nagakalisod bangud nga nagagil-ang eon ro andang mga eanas bangud sa kakueangan it nagasueod nga tubi halin sa irigasyon.
Partikular nga gintumod kara ro mga portion it Nalook sa Kalibo kamana man sa Guinbaliwan, Lawaan ag Jugas sa banwa it New Washington.
Ginpahayag dugang ni Ibardolasa nga dapat nga pabay-an anay nga maka abot sa punta ro tubi nga makapaubos agud nga ro tanan hay magapanipueos.
Nauna eon nga nagreklamo sa Bombo Radyo ro sangka mangunguma sa Brgy. Nalook bangud nga owa sigon it maayos nga patubi nga naga-ilig sa andang mga ueumhan rason nga amat-amat nga nagakasamad ro andang mga tanum nga paeay ag ginakabaeak-an nga magahina ro ani.
Owa sigon it tubi nga maka abot sa punta hasta nga may mga mangunguma nga nagapunong it tubi.
Bangud suno kana sa nagapaabot nga el nino phenomenon nga amat amat eon nga nababatyagan sa probinsiya hay mabahoe ro posibilidad nga pagakueangon ro tubi it taeatapan maskin nga stable ro water source kara.
Apela man nana nga ibalik ro dating nakasanayan nga pag angkon it mabahoe nga pilapil agud nga indi basta-basta nga mahubas ro tubi sa mga kaeanasan.
