KALIBO, Aklan—Gin-abswelto it kapulisan ro Numancia Integrated School sa natabu nga pagpamaril sa sueod it andang campus sa katung-anan it selebrasyon it Teachers Day, agahon it Martes .
Suno kay P/Lt. Riza Padilla, deputy chief of police it Numancia Municipal Police Station nga owa it naging kakueangan ro pamunuan it nasambit nga eskwelahan.
Pirme sigon nga nakikipag-coordinate ro principal kara kanda agud nga masayuran kon ano ro dapat nga obrahon sa mga estudyante nga eakot sa gang ukon grupo-grupo nga owa naga-ilintindihan .
Dugang pa nga may gwardiya ro eskwelahan ag ro kada gamit it mga estudyante hay gina-usisa gamit ro metal detector , apang posibleng natiempo sigon nga naging haeuga ro seguridad ko Martes bangud sa ginpatigayon nga programa .
Base sa inisyal nga imbestigasyon, nag-ugat ro gulo kat ginbayo it grupo it CICL ro 19-anyos nga biktima ko Lunes samtang magapa-rehistro kunta sa comelec office sa munisipyo it numancia .
Uman nga nagkita ro daywang grupo ko Martes sa sueod it campus ag nakaangkon it komprontasyon nga nagresulta sa baeaywan hasta nga gina-alegar nga nagbo-oe it anang sumpak ro 16 anyos nga binatilyo halin sa anang sling bag ag ginbaril ro biktima nga tinamaan sa anang waea nga kilid.
Sa ap-at nga gin-imbitahan nga CICL, owa it sin-o man nga nag-aku kon sin-o ro nagapanag-iya it sumbak nga owa eon narekober matapos ro krimen.
Sangka stainless nga siyaw eamang ro nabo-oe sa poder it CICL.
Gina-insister sigon it CICL nga gin-agaw eamang nana ro sumpak halin sa biktima kabaliskaran sa pahayag it pilang testigo nga ginbo-oe nana raya halin sa anang sling bag.
