KALIBO, Aklan—Ginlunsar it Numancia Municipal Police Station ro Secure, Accurate, Free and Fair National and Local Elections ukon S.A.F.E NLE 2022 nga ginatawag man nga “Kasimbayanan”.
Suno kay P/Major Fidel Gentallan , hepe it Numancia PNP nga kaibahan sigon nanda sa nasambit nga proyekto ro mga stakeholders halin sa simbahan ag komunidad.
Tuyo suno kana it proyekto nga magabueuligan ro tanan agud nga malikawan ro korapsyon ag kinagamo sa electoral process.
Nagpatigayon man sigon it Manifesto Signing of a Covenant of Peace agud nga mapabutyag ag maalagaan ro pagkaeasugot it komunidad agud nga makaangkon it masaligan ag may kredibilidad nga electoral process.
Dugang pa ni Major Gentallan nga magapatigayon man sanda it routine visits sa kada komunidad kaibahan ro pilang barangay officials ag iba pa agud nga mapasiguro ro maayos nga eleksyon sa Mayo 9.
Kaibahan man sigon sa mga pagpahaum hay ro pag-deploy it mga kapulisan sa mismong adlaw it eleksyon.
Kadungan it hugut nga pagpatigayon it comelec checkpoint kontra sa gun ban, kampanya kontra sa illegal nga droga ag iba pang klase it kriminalidad, pagabantayan man nanda ro tanan nga mga electoral threats.
Sa pihak kara, makabig man sigon nga malinong ro banwa it Numancia kada nagapatigayon it eleksyon.
Ginpaabot eon man sigon ro guidelines sa mga aspirante sa pag-umpisa it campaign period sa local candidates sa buean it Marso.
Samtang, ginklaru ni Major Gentallan nga kaibahan sanda sa Task Force Oplan Baklas , apang ro pagtau eamang it seguridad ro andang papel.
Bukon sigon nanda it obligasyon ro magbak-eas it mga posters ukon campaign materials nga owa sa tamang sukat ag nakakabit sa bukon it tamang lugar.
Ginpasiguro man nana ro pagiging non-partisan it PNP.
