Nagapadayon ro imbestigasyon it Numancia Municipal Police Station angot sa nasapwan nga bangkay it biktimang si Jack Mererague, 41-anyos it Brgy. Guibongan, Miag-ao, Iloilo.
Suno kay PCpl. Arjoren Mendoza, imbestigador it Numancia PNP nga uwa pa it may nagguwa nga tawo nga nakakilaea ukon ginsapuean it biktima iya sa Aklan antes pa man nakit-an raya nga uwa eon it kabuhi nga nakaputos sa bedsheet ag posibleng ginpilak sa kilid it karsada sa Brgy. Albasan, Numancia.
Dugang pa ni PCpl. Mendoza nga sa andang inisyal nga pagtan-aw, ro andang mga igo it pagbuno sa nagkaeain-eain nga parte it eawas hay medyo agi it sangka ice peak ag ro anang lastro sa ueo hay posibleng ginbunaean it matig-a nga bagay.
Apang, kinahang-ean pa raya nga ikumpirma sandig man sa post mortem report it Numancia rural health unit sa oras nga magguwa eon ro dokumento.
Samtang, ginpahayag it tag-iya it punenarya nga gindaeahan it bangkay ni Jack nga si Jangie Gorion, nakipag-angot eon sigon kanda ro pamilya it biktima ag ginkumpirma ro pagkakilan-ean kara matapos nga makit-an ro patay nga eawas it eaeaki.
Raya sigon nga eaeaki ro mabuhay eon nga ginausoy it pamilya matapos nga uwa eon raya it contact kanda halin kat nag-eaong nga mag-usoy it trabaho hasta nga nabalitaan eon lang nanda nga patay eon raya iya sa probinsya it Aklan.
Ginpahayag dugang nga manas eon ro eawas it biktima kat nadaea sa morge ag may lastro sa dughan ag ueo.
