KALIBO, Aklan—Nagtaas ro numero it mga pamatan-on nga naga-edad it 15 hasta 17 anyos nga nagparehistro sa nagapadayun nga voters registration sa nasyon.
Raya ro ginpahayag ni Crispin Raymund Gerardo, tagapaghambae it Commission on Elections ukon Comelec-Aklan.
Angot kara, gin engganyo nana ro tanan nga magiging bag-ong botante ag sa mga gusto nga ibalik ro andang rehistro nga maghingabot sa deadline sa Hulyo 23.
Mag-agto sigon sa andang taeatapan umpisa alas-8:00 it agahon hasta alas-5:00 it hapon.
Ginpadumdum nana nga ro registration hay owa eon it extension.
Raya hay para sigon sa Barangay ag Sangguniang Kabataan Elections nga pagahiwaton sa December 5 makaron nga dag-on.
Suno kana nga ko unang dominggo hay nakapagproseso ro Comelec it 3,355 nga applications samtang ko 2nd week hay 5,996 para sa SK sa bilog nga probinsiya it Aklan.
Nag-apela pa si Gerardo nga likawan ro last minute nga pagparehistro agud nga malikawan ro pagdueutdutan.
Ro mga kuwalipikado nga mag-aplay para sa pagboto sa regular elections kaibahan ro barangay elections hay ro mga magiging 18-anyos pag-abot it Disyembre 5.
Sa pihak nga parte, gindugang pa ni Gerardo nga sa pihak it mga panawagan nga suspindihon ro eleksyon agud nga makatipid sigon sa pondo ro gobyerno hay padayun ro andang preparasyon.
Suno kana nga hasta nga owa it laye nga magasuspinde sa eleksyon, padayun sanda sa andang mga nakalindaya nga aktibidad.
