KALIBO, Aklan–Una eon sa estable nga kondisyon ro sangka Overseas Filipino Worker (OFW) nga nagpositibo sa monkeypox virus sa Singapore.
Suno kay Bombo International Correspondent Mercy Cacan, sangka 31-anyos nga eaeaking OFW ro nagpositibo sa monkeypox ko Hulyo 25.
Makabig suno kana nga locally transmitted ro kaso it nasambit nga pasyente bangud owa man raya it travel history sa mga lugar nga infected it virus.
Sa report it Ministry of Health (MOH) it Singapore, Hulyo 21 kat gin-eagnat ro OFW ag nagdevelop it rashes sa anang uyahon ag iba pang parte it eawas.
Nagdesisyon sigon imaw nga mag-adto sa Singapore General Hospital kung siin ginpaidaeom raya sa monkeypox testing ag dikato nakumpirma nga positibo sa virus.
Ro nasambit nga OFW ro ika-siyam nga nailistang kaso it monkeypox it Singapore.
