KALIBO, Aklan—Nagpanawagan ro Office of the Provincial Veterinarian ukon OPVET-Aklan sa mga online dealers it mga pork ag pork products nga likawan anay nga magbaligya it mga produkto nga halin sa guwa it probinsiya.
Raya hay kasunod it ginpatigayon nga entrapment operation sa sangka negosyante sa may parte it Oyo Torong St. Kalibo kun sa siin nakumpiska ro masobra sa P150,000 pesos nga balor it ginpa-eusot nga mga meat and pork products nga owa it nagakaigo nga label nga ginasugid nga naghalin sa Luzon.
Suno kay Dr. Joseph Lachica it OPVET-Aklan nga ro mga pork ag pork products nga owa it maipakita nga nagakaigo nga dokumento partikular ro certificate of acceptance hay pagakumpiskahon ag posibleng papanaugan it multa sa pag-eabag sa naga-eksister nga provincial ordinance 2021-011 ag ginpaguwa nga executive order ni governor Joen Miraflores nga nagapaeapad pa sa ginpatuman nga total ban it mga karne it baboy ag produkto kara sa Aklan agud nga makalikaw sa African Swine Fever.
Samtang, gindugang pa ni Dr. Lachica nga gina-usisa man nanda makaron ro posibleng kuntsabahan it mga online dealers ag mga transport carriers partikular ro mga bus company nga illegal nga nagapasueod it mga produkto.
Angot kara, nag apela man ro OPVET sa nagkaeain-eain nga mga LGU’s sa Aklan nga magpatigayon it kaugalingon nga checkpoint ag random nga monitoring sa mga tindahan ag iba pang outlet kontra sa mga nagabaligya it mga produkto nga owa it nagakaigo nga dokumento.
Kaeabanan sigon nga gina-suki ro mga produkto halin sa Luzon bangud nga mas barato kumpara sa mga local products.
Ro mga nakumpiskang illegal nga pork ag pork products hay insigidang ginasunog ag gina-eubong.
