Padayon ro ginahimo nga mahugot nga pagbantay it Office of the Provincial Veterinarian (OPVET) Aklan sa mga boarder nga marapit sa probinsya it Capiz.
Raya hay kasunod it mga nareport nga pag-eapta it kaso it African Swine Fever (ASF) sa lugar.
Suno kay Ivy Francisco, Livestock Inspector 1 it nasambit nga taeatapan, padayon ro andang pag-himo it tikang para nga mapunggan ro posibleng pag-eapta it nasambit nga masakit sa mga alagang baboy.
Sambilog eon sigon sa andang strategic nga tikang ro pag-butang it mga border control, eabi eon sa banwa it Balete nga kaibahan sa yellow zone ag padayon nga ginabantayan it probinsya.
Mageuwas kara, may anda man sigon nga ginpahaum nga Executive Order nga pirmado eon man it gobernador.
Nakabaehag sa nasambit nga executive order ro pag-bawae sa mga probinsya nga may kumpirmadong kaso it ASF nga magpasueod it suplay, pati eon man ro pre-emptive banning sa mga kaeapit nga probinsya it may kumpirmadong kaso.
Sa makaron, uwa pa it narecord nga kaso it ASF sa probinsya, apang nagapabilin nga naka-high alert bangud sa mabahoe nga posibilidad.
Paathag pa nana, maga-pokus eon lang anay sa lokal nga suplay apang pwede pa nga makabuoe sa ibang probinysa nga uwa it kaso kapareho it Antique.
