KALIBO, Aklan—Ginpahayag it Commission on Election ukon Comelec-Kalibo nga owa it kandidato para sa lokal nga posisyon ro nagdihon it andang Certificates of Candidacy (COC) sa unang adlaw it filing sa banwa it Kalibo.
Suno kay Atty. Christian Itulid, election officer IV it Comelec-Kalibo nga owa it kandidato ukon tagasuporta ro nag-agto sa andang taeatapan kahapon it Martes.
Ginpahayag kara nga bukas ro andang Comelec office umpisa alas 8 it agahon hasta alas 5 it hapon hasta sa Oktubre 8, 2024, kaibahan ro Sabado ag Domingo.
Angot kara , ginpasiguro nana nga haum ro andang taeatapan sa mga kandidatong maga-file it andang COC.
Umpisa suno kana ko nagtaliwan nga mga domingo hay maabu eon man ro nag-request kanda it COC form.
Pagabatunon sigon nanda ro COCs ag Certificates of Nomination and Acceptance ukon CONA, basta nga kompleto ro kopya ag tama ro andang pag-sueat sa form.
Ginpakamayad sigon nanda nga indi magsaylo it venue ag magpabilin sa andang opisina sa old building it munisipyo bangud nga sangkiri man lang ro mga kandidato ag para man sa seguridad it andang staff.
Sa pihak nga parte, ginpahayag ni Atty Itulid nga indi eagi nanda madeklara nga nuisance candidates ro sangka gustong magkandidato bangud nga ro andang law department sa national headquarters ro naga-evaluate kara pagkatapos it COC filing.
