KALIBO, Aklan — Ginkumpirma it Police Regional Office (PRO 6) nga generally peaceful ro unang tatlong adlaw sa pag-arangkada it 90-day campaign period para sa national candidates ko nagtaliwan nga Pebrero 12.
Raya ro ginpahayag ni P/Lt. Col. Arnel Solis, tagapaghambae it PRO-6.
Suno kana nga base sa andang National Election Monitoring Action Center, owa it anuman nga major untoward incidents ro natabu sa bilog nga Region 6.
Maskin suno kana nga gin-umpisahan eon ro campaign rally sa siyudad it Iloilo it pilang kandidato hay owa it nailistang kinagamo.
Angot kara, gina engganyo ni Solis ro tanan nga mga kandidato kaibahan ro andang mga tagasuporta ag publiko nga ipabilin ro kalinong, kaayusan ag rule of law sa nagapadayun nga campaign period para sa May 12 election.
Ginpasiguro man it PRO-6 nga igapatuman it andang mga naka deploy nga personnel ro laye nga may kaangtanan sa eleksyon, partikular ro gun ban kabulig ro Commission on Elections (Comelec) ag iba pang natungdan nga ahensiya.
Sa makaron hay naka-aresto sa bilog nga Region 6 it 41 nga indibidwal nga nag-eabag sa gun ban.
Sa nasambit nga numero, daywa kara ro naghalin sa Aklan, 1 sa Antique, 8 sa Capiz, 3 sa Guimaras, tig-4 sa Iloilo City ag Iloilo province, 7 sa Bacolod City , 10 sa Negros Occidental ag 2 ro naaresto it Regional Mobile Force Battalion 6.
Tatlo kara ro halin sa uniformed service ag ro nabilin hay puro mga sibilyan nga nagahupot it loose firearms.
Sa pihak nga parte, ginpahayag dugang ni Solis nga magiging patas ro kapulisan, professional ag dedikado sa pagpatuman it mandato nga protektahan ro demokrasya ag ro kada pumueuyu sa tiempo it eleksyon.
Maga umpisa man ro kampanya para sa mga lokal nga kandidato sa Marso 28.
