KALIBO, Aklan—Pormal eon nga nagpungko bilang officer in charge it Kalibo Municipal Police Station si P/Major Frenzy Andrade.
Sa turnover of command nga ginpatigayon sa police station it Kalibo MPS, Oktubre 15, 2024, ginsaylo ni P/Lt. Col Ricky Bontogon ro pagdumaea it nasambit nga police station kay Andrade makaraang nga uman raya nga ginbalik sa Aklan Police Provincial Office sa Camp Pastor Martelino.
Ro event hay ginpangunahan ni Aklan Provincial Director P/Col. Victorino Romanillos nga nagpahayag it anang kumpiyansa kay Major Andrade nga mapabilin ro peace and order sa banwa.
Ginpadumdum nana sa kapulisan nga ro nagapanguna nanda nga trabaho hay crime prevention ag crime solution .
Sa pihak nga parte, sa anang diskurso, ginpahayag ni Major Andrade nga maskin nga indi makapati sa gintau kana nga oportunidad, apang malipayon sigon imaw nga serbisyuhan ro anang kaparehong Kalibonhon kun sa siin pila sa anang mga tikang nga igapatuman hay mas pang hugtan ro mga operasyon kontra sa illegal nga droga ag iba pang nagakatabu nga kriminalidad.
Ginhinyu man nana ro kooperasyon it mga kapulisan ag mga pumueuyu para sa ikamadinaeag-on it andang katuyuan .
Nasayuran nga si Major Andrade hay haeos 12 anyos nga nagpungko bilang head it Provincial Drug Enforcement Unit ukon PDEU-Aklan.
Magapabilin man sa andang dating mga posisyon sanday P/Capt Benny Jones Mendoza bilang deputy chief of police for operations samtang si P/Major Willian Aguirre hay deputy chief of police for administration.
Indi pa matumod sa makaron kon sin-o ro magabueos sa paga-aywan nga pwesto ni Andrade sa PDEU.
