Ginpabugae ni PNP Director for Logistics, PMGen. Ronaldo Olay, nga madinaeag-on nga nataw-an it katumanan it PNP ro P3.5 bilyong haega it procurement projects nga kaparte it andang Capability Enhancement program.
Suno kay Olay, raya hay ginabilog it 17 proyekto halin sa 2020 hasta sa presenteng dag-on nga ginakaeakipan it mga bag-ong high-speed tactical watercraft, Utility Truck, Medium Troop Carrier, patrol jeeps, ag iba pa.
Madumduman nga ro mga bag-ong bakae nga gamit hay ginpresentar kay PNP Chief PGen. Dionardo Carlos ko nagtaliwan nga Pebrero 9 sa Camp Crame.
May kaangtanan kara, gintaw-an it plaque of appreciation makaron nga adlaw sa Camp Crame ro mga miyembro it PNP National Headquarters-Bids and Awards Committees (NHQ-BAC), Technical Working Group, NAPOLCOM, People Power Volunteers for Reforms (PPVR), ag Commission on Audit sa andang papel sa maayos ag transparent nga procurement process.
Gindayaw man ni PNP Deputy Chief for Administration Police Lt. Gen. Rhodel O Sermonia ro mga awardees sa pagpasiguro nga owa it eamud it korapsyon ro procurement process sa PNP.
