KALIBO, Aklan—Nagaeaum nga magata-o it padayon nga suporta ag seguridad sa mga overseas Filipino workers ukon OFW’s ro pag-abot ni Pangueong Ferdinand Marcos Jr. para sa Asia Pacific Economic Cooperation ukon APEC summit sa Thailand.
Raya ro ginpahayag ni Bombo International Correspondent Michael Garulacan it Bangkok, Thailand kasunod it aktibidad it presidente makaron sa nasambit nga nasyon.
Kaibahan it presidente si First Lady Louise Araneta-Marcos ag mga delegasyon para sa ap-at nga adlaw nga pagbisita.
Ginpahayag dugang nga naimbitahan ro pangueo sa sangka pueong kaibahan ro ibang lider it nasyon nga kaeakip sa summit kon siin gin-istoryahan it mga raya ro enerhiya ag food security.
Nag-apela sigon ro pangueo sa kaparehong mga lider nga nagakinahang-ean it pagtutok sa seguridad sa pagkaon, pangkalibutanong sistema sa ikaayong eawas ag climate change.
Nauna eon nga gin-insister it pangueo nga dapat prayoridad it tanan nga gobyerno ro sangka flexible nga mga patarakan para masiguro nga mapataas ro domestic food productions ag mapaayos ro local agricultural supply ag value chain.
