NATIONAL News —- Hugut ro naging sueundanan it COMELEC para sa mga kandidato nga magapatigayon it mga aktibidad sa pag-umpisa it kampanya makaron nga adlaw, Pebrero 8, para sa mga national candidate.
Ginpahayag ni COMELEC Director Elaiza David nga kinahangean anay nga mag-apply it authorization sa mga taeatapan it komisyon ro mga kandidato antes nga makapangampanya, caravan, meeting de avance, rally, motorcade ag iba pa.
Ginapadumdum man ro mga lokal nga opisyal nga siguraduhon nga ginasunod ro mga ginpaguwa nga guidelines it COMELEC para sa eowas ag maayos nga pangangampanya ag indi maging superspreader event ro mga ginapatigayon nga aktibidad sa pagkampanya it mga kandidato.
Naunang ginpaguwa it COMELEC ro hugut nga mga sueundanan para sa pagkampanya it mga kandidato kapareho it pagbawae nga makipag-selfie, makipag-lamano sa mga botante, bawae magsueod sa mga baeay, bawae magpanupod it pagkaon, bawae ro beso-beso ukon kupkop ag tanan nga physical contact agud nga masigurong masunod ro minimum public health standard.
