KALIBO, Aklan—Nagmando si Philippine National Police (PNP) Chief General Dionardo Carlos sa tanan nga mga field commanders nga inspeksyunon ro mga cellphones ag gadgets it andang mga tawuhan para masiguro nga owa naeakip ro mga raya sa paghampang it online sabong.
Suno kay Police Lieutenant Colonel Arnel Solis, tagapaghambae it Police Regional Office (PRO)-6 nga hugut nga ginabawae sa mga pulis nga maghampang it e-sabong sa oras it andang trabaho.
Bukon sigon raya it pageabag sa “privacy” it mga pulis, kundi sangka pamaagi agud nga mapangalagaan ro mga miyembro it PNP halin sa pagka-eubong sa utang.
Ro sin-o man sigon nga madakpan nga nagahampang it online sabong samtang naka-duty hay magapangatubang it nagakaigo nga penalidad.
Bangud kara, ginpadumdum ni Solis ro anang mga kabaro nga maging responsable ag ipabilin permi ro disiplina sa kaugalingon.
Nasayuran nga mismong ro PNP Chief Directorial Staff ro nakadakop sa akto sa sangka pulis nga nagahampang it e-sabong sa anang cellphone.
Sa pihak nga parte, nagapadayun man ro ginahimo nga surprise inspection ag drug testing sa tanan nga estasyon it pulisya sa bilog nga Western Visayas.
Ginapahayag nga kaparte raya it internal cleansing sa sueod it PNP.
Tuyo sigon kara nga masiguro nga owa nagapasakop sa iligal nga droga ro mga police personnel ag masiguro nga tampad ro mga raya sa pagtao it serbisyo-publiko.
Ginpabugae pa ni Solis nga owa it maskin sambilog nga pulis sa rehiyon ro nagpositibo sa ginpatigayun nga random drug testing.
