KALIBO, Aklan—Ginpromisa it Provincial Engineering Office ukon PEO nga paga-umpisahan eon sa masunod nga domingo ro repair ag reblocking it pilang parte it ginareklamo nga provincial road umpisa sa Brgy. Polo, Sigcay hasta sa Brgy. Bacan, Banga.
Ginpahayag ni Engr. Edilzon Magalit , head it PEO-Aklan nga gina-umpisahan eon nanda sa pagtipon ro mga gamit nga kinahangeanon.
Naka-abot man sigon kanda ro reklamo it mga motorista sa takaw aksidente nga karsada.
Nasayuran nga nauna eon nga nakipagpueong si Engr. Magalit sa iba pang mga natungdan nga engineers agud nga maistoryahan ro dapat nga obrahon sa nasambit nga karsadahon.
Suno kana nga iga-prayoridad nanda ro mga karsada nga may mabahoe nga crack ukon samad.
Aminado man imaw nga responsibilidad it PEO ro nasambit nga daeanon.
Nagapati si Engr Magalit nga bangud sa mga overloaded nga truck nga halin sa quarry site ro rason kon ham-an nga pirmeng nagakasamad ro mga karsada sa nasambit nga lugar.
Pilang regulasyon eon man sigon ro ginpatuman partikular ro hugut nga monitoring ag pag-implementar it mga ordinansa, apang owa gihapon nasolusyunan ro problema bangud sa pag-operate nanda sa dis-oras it gabi-i, kun sa siin owa it bantay.
Sa makaron hay ginaduso ro pagbutang it weigh bridge agud nga malikawan ro overloading.
Ginpahayag dugang nga owa pa sanda it nakikita nga long term solution kara kundi nga ro pag-repair sa karsada kada masamad.
